Maa tum kahan ho?

Aankh khuli ek hulchul si kamre mein hai,
hazaron chehre hein hone ko,
fir bhi kuch kami si hai ||

Baba ko bhi waqt kahan,
unki aankhon mein kyun nami si hai ||

kyun koi mujhse nahi kar raha baat,
koi shaitaani bhi meine nahi kari aaj ||

Dadi tum toh kuch bolo,
aakhir kyaa baat hui ||

Man mera ghabra raha hai,
aaj koi aakar mujhe kyun nahi sarah raha hai ||

Dadi kuch boli nahi,
seene se laga ke vo rone lagi,
man mein mere ab hulchul si hone lagi ||

Meine dekha amma ko,
safed chaadar ode hue,
band thi unki aankhein,
kuchh na bol rahi thi woh,
lagta tha jaise kuch soch rahi thi woh ||

Arrey! kahan jaa rahi ho tum amma..
kyu tum chaaron ho unhe uthaaye..

Amma tum toh so rahi ho ..
kaash mujhe bhi neend aajaye!